Maria Parrs (bildet) barnebok «Tonje Glimmerdal» blei selt til fem land alt før utgjeving. Dette er den andre boka til Parr. Ho debuterte med «Vaffelhjarte» i 2005, og er ein av mange Samlagsforfattarar som kjem med bok nummer to i haust.
Maria Parr har skrive barneboka «Tonje Glimmerdal».
– Sterke andre- og tredjebøker pregar Samlagets skjønnlitterære utgiving i år. Ein ung generasjon etablerer seg no som forfattarar. Dei er profesjonelle fordi dei satsar på skrivinga, dei er ambisiøse fordi dei vil fornye litteraturen, og dei har tydelege prosjekt fordi dei skriv bøker vi kjem til å hugse. Underskogen av unge, gode stemmer som skriv skjønnlitteratur på nynorsk er meir vital enn på lenge, og eg spår at dei unge forfattarane på årets liste om nokre år er blant dei sentrale i norsk litteratur, sa forlagssjef Margit Walsø då ho presenterte forlagets haustliste.
Marit Eikemo debuterte i 2006 med romanen «Mellom oss sagt», og også den nye romanen, «Arbeid pågår», blir karakterisert som underhaldande og samtidskritisk. Her handlar det om Harald Strand som har pakka koffert og laptop for å fullføre doktoravhandlinga si om Henrik Ibsens drama. Det er lett å forstå at han blir distrahert når han kjem til Costa Blanca, ein av Europas største byggjeplassar med folk som er litt for glad i å sole seg, har litt for mykje å drikke og litt for lite å gjere.
Bok nummer to frå Rune F. Hjemås er novellesamlinga «Indianarar». Knapt, realistisk, men også absurd handlar det om unge menneske som opplever at kvardagslege situasjonar snur og blir dramatiske, kjente situasjonar endrar seg og blir mystiske.
Olav Kristiseter har skrive forteljingar inspirerte av Shakespeare. I «Glør i sommarnatta» blir vi med til ei bygd som har alt: pølsekioskar, kommunehus, hotell og skolar. Her møter vi misforståtte ungdommar som på midtsommarnatta krasjlandar på hytta til rådmann Warnæs, der det er bryllaupsfest og revypremiere.
Sigmund Løvåsen, tidlegare vinnar av Vesaas’ debutantpris, overraskar med ein burlesk bygdekrim frå starten av 1900-talet: «Mamsell Iversen». Pauline Lindstad blir funnen brutalt drepen i moltemyra, og med humor og gravalvor blir vi kasta inn i elleville historier og møter fargerike karakterar.
Jon Fosse fyller 50 år i haust, og det kjem to nye Fosse-bøker i haust: ei ny diktsamling og bildeboka «Spelejente», som er illustrert av prislønte Øyvind Torseter.
Debutantar
Samlaget har fire skjønnlitterære debutantar i haust, og to av dei er søstre. Sigrid og Guri Sørumsgard Botheim har lagt handlinga til eit pensjonat, Ramstein pensjonat, som også er tittel på boka. Det handlar om Sigurd og Debbey, som også er søsken, og der broren har ein hobby: å spionere på storesøster.
Bjarte Daviknes Klakegg debuterer med «Heliumhjarte», korte historier som spenner frå det realistiske til det fabulerande.
Erlend Kaasa har skrive «Thunder Road», om vennskapen mellom Mattis og bestefaren, og kva ein gjer når forteljinga om eigen familie viser seg å ikkje vere sann.
Sakprosa
Jon Fosse si reise frå Strandebarm og til dei store teaterscenene i Europa, har Cecilie Seiness følgd i portrettboka «Jon Fosse. Poet på Guds jord». Gjennom samtalar om liv, kunst og dikting fortel ho historia om eit uvanleg talent med urokkeleg tru på eiga skriving.
Olaug Nilssen har bestemt seg for å finne ut kva det er med Sigvart Dagsland som gjer han til ein av dei mest folkekjære artistane i Noreg. Men ho er like opptatt av å finne ut kor kristen han eigentleg er. Boka har fått tittelen «Nesten frelst av Sigvart Dagsland».
Ottar Fyllingsnes har skrive boka «Jon Eikemo. Pokker til kar!» Dette er ein samtalebiografi om Eikemo, som fyller 70 år i haust.
Jan Inge Sørbø har skrive bok om diktaren Olav Aukrust: «Ørneflukt og ormegard». Dette er ein usminka og grundig biografi, og Sørbø har fått tilgang til mykje nytt materiale og viser korleis poeten Aukrusts innfløkte familie- og kjærleiksliv har sett spor i diktverka.
Per Anders Todal tek oss med til Kviterussland i boka «Fanden på flat mark». Gjennom essay, reiseskildring og personportrett fortel forfattaren og journalisten både litterært og engasjerande om dette landet med den tragiske og rike historia.
I «Draumen om Abebe Bikila» har Svein Sæter skrive ei reiseskildring frå Etiopia, eit av dei største og mest folkerike landa i Afrika. Her møter vi enkeltmenneske med sterk livshistorie og stor viljestyrke.
Stikkord: høstlister
