Konkurransetilsynet har varsla Aschehoug & Co (W. Nygaard) AS og NorgesGruppen ASA om at det kan bli aktuelt å gripe inn mot den planlagde fusjonen mellom Norli Gruppen AS og NorgesGruppen Bok og Papir AS.
– Grunnlaget for varselet er først og fremst at konkurransen blir redusert i ein lang rekke lokale marknadar dersom fusjonen blir gjennomført. Forbrukarane vil få for få konkurrerande bokhandlarar å velje mellom, seier avdelingsdirektør Jostein Skaar i Konkurransetilsynet.
Etter tilsynets vurdering vil fusjonen medføre svekka konkurranse innan sal av bøker frå fysiske allmennbokhandlarar i Trondheim, Kristiansand, Drammen, Kongsberg, Lillehammer, Haugesund, Levanger og Sarpsborg.
Etter konkurranselova har selskapa 15 verkedagar på seg til å kommentere tilsynets varsel. Tilsynet har etter dette 15 verkedagar til å treffe endeleg vedtak i saka.
