Snart kan du laste ned e-bøker frå det fellesnorske prosjektet som bransjen står bak. Første måndagen i april kan du laste ned bøker frå Bokskya.
Etter fleire forseinkingar er no e-bokprosjektet klar til å lanserast. Måndag om to veker, altså måndag 4. april, kan du laste ned e-bøker frå Bokskya.
- Bokskya er unik, og så godt som plattformuavhengig. Startar du å laste ned ei bok heime på iPad, kan du halde fram lesinga på mobilen når du sit på toget. Bokmerka blir synkroniserte, slik at du held fram der du slapp. Du får alltid tak i bøkene dine, seier administrerande direktør Edmund Austigard i Den norske Bokdatabasen til Norsk Telegrambyrå.
Når det gjeld spørsmålet om kva e-boka vil koste, er Austigard varsam med å utale seg.
