Den engelske kommunen South Tyneside har fått utlevert identiteten til ein bloggar som skal ha skrive krenkande meldingar om fleire medlemmer av bystyret.
Det uavhengige bystyremedlemmet Ahmed Khan, som er mistenkt for å vere bloggaren som under namnet Mr Monkey har ytra dei krenkande meldingane, stadfestar overfor BBC at han har fått skriftleg melding frå Twitter om at informasjon om identiteten hans er utlevert til leiinga i kommunen.
Khan, som ikkje legg skjul på at han kan ha friske meiningar om politiske motstandarar, nektar for at det er han som står bak bloggen og Twitter-meldingane.
Britiske ekspertar på mediejuss trur dommen kan få fleire til å gjere som South Tyneside for å tvinge Twitter til å oppgje brukar-ID.
Professor i rettsinformatikk ved Universitetet i Oslo, Jon Bing, meiner dommen kan få stor betydning for personvernet til alle som har ein Twitter-konto, men understrekar at krenkingssaker som dette har to sider.
- Det er viktig ikkje å oversjå at dei som blir krenka har krav på å kunne forfølgje nokon rettsleg, og at vern av fornærma må vurderes opp mot vern av identiteten til dei som ytrar seg, seier Bing til Aftenposten.
